توروالی خزمتی انٹرنیٹ زید دھمکی او بدمأشی سی مُوش کے کُو ایِڑی ہُوئی۔

^[1]

Illustration by Muhammad Rahim for Rising Voices.

توروالی خزمتی انٹرنیٹ زید دھمکی او بدمأشی سی مُوش کے کُو ایِڑی ہُوئی۔

توروالی ڈیجیٹل سرگرمی آں پاکستان می ایسکے درپیش مسئلہ
زبیر توروالی
أ ڈیجیٹل سیکیوریٹی–ٹیم ائی بی ٹی سی تحقیق سی حصّہ تُھو۔ مے تحقیق زبیر توروالی کیدُو۔

پاکستان می سوات سی درہ تُنُو قُدرتی شیِوچا دے مشہور تُھو آں تُنُو ذرخیز تباریخ او ثقافتی ورثہ سی سر تے محققین، چکری او لکھاریِا می چیرے پیِانیل تُھو۔ ہے پاکستان می ثقافتی لحاظ سے رنگارنگ ثقافتی علاقہ می ایک حساب ہودُو۔ ہے اَئی بی ٹی سی ٹیم سی شیِر چھی آں ہے ٹیم سے خلگ تھی کامیک یأمینے توروالی جیِب سی جأن دھرؤ سی کیا، ایِسی مُوٹھائے نیُو سی کیا آں ایِسی حفاظت سی کیا کام کودی۔ ہے ٹیم یأمینے کامیک تُھودا ہے توروالی جیِب می کتاب چاپ کؤ او ٹریننگ ما علاہ انٹرنیٹ او سوشل میڈیا زید ہُم جیِب سی کیا کام کودُو آں ہامُوڑ خلگا می توروالی سی لیِگُو او بنُو آں تُنُو(شناخت) آمن پیِانُو سی کام کودُو۔ ہے نم کم نم مسئلہ ہُم پیدا کودی تھأ می تینگی کؤ، ایجنسیا سی دیشا ایِں جاسوسی کؤ آں سوشل میڈیا زید دھمکی او گألا سی دیؤ شامل تھی۔ ایِما پتا گھڑئی یرأ مے ٹیم گے تُنُو جیِب کے تیِریِقی سی دیؤ سی کیا تُنُو امن گے ڈیجٹل حفاظت سی ضرورت چھی۔

شمالی پاکستان سی ٹول داردی کھاما می توروالی کھام سوات زید ݜیئݜم صدی می پٹھانا سی حملہ دے چیر متاثر ہُودُو۔ ایس چیر سختیِے دے ٹین کی۔ ایِسی دھیریِن گھرأد آں ایِسی تباریخ او ثقافت تباہ کی۔ توروالی کھام کأش ڇُوأشُک زُومان ما ہابکے صرف اے شیئی ایِسی جیِب، توروالی دھأک روایتی کیتھأن او زبانی رسم او رواجی بأت مأدا سمان دھیریِئی۔ اے لکھ دش زر او بیِش (130،000) بناڑ خلگا سیت توروالی جیِب مھیرے ہُم سوات می دأل جیِب پختو، گاؤری، کھوار، گوجری آں اوݜوجو سمان جأن چھی۔ کہ آئی بی ٹی حی دے آں منظم طریقہ دے ای زید آں ایِسی ثقافت سی جینی کؤ سی کیا کام نی کیِشُو او اِی جیِب ہُم ہاڙشنیِندے! ائی بی ٹی سی مطلب ا ب ت یعنی تعلیم او تیِریِقی سی ادارہ چھی آں ہے اے غیرسرکأری او غیر منافع خور تنظیم تُھو ہے شمالی پاکستان می زئیبدی آں پأشکے تھلیل کھاما سی تنُو کُھوا زید ایِڑی ہؤ او تیِریِقی سی کیا کام کودُو۔

سن 2004ء ما ہابکے جیِب سی جینی کؤ سی کام تنُو جیِب می تعلیم سی پروگرام سی وجہ دے چیر تیزی دے روان تُھو۔ کھامُو یأ اے جیِب دأل مسئلہ ئے ما ڈھأرکے آمن سیت نہ دھربھائی، ایسکے بُودے ائی بی ٹی اے مکمل گھنڈیل آں ہر ڈھأر کے غورکوئیل کام شروع کی تیندے توروالی خلگا می آمن زید فخر کؤ، تُنُو آصل پیانُو آں جیِب سی لیِگو او بنُو شامل تھی۔ ایمی لُوڑا ئے آول تُنُو جیِب می لؤا ئے بنیادی تعلیم، ثقافتی او انسانی حقا سی کیا تیزی دے کام کؤ، ثقافتی منجلس، توروالی شاعری او موسیقی سی جینی کؤ آں توروالی زُوانا سی تھیِن تعلیم می مدد کؤ شامل تھی۔ آں انٹرنیٹ سی یِؤ ما بعد جیِب او ثقافت آں آمن پیانُو سی کیا چیر گن مسئلہ سی اندرے دھیرتے سوشل میڈیا سی استعمال سی حی ٹھما کام ہُم شامل تُھو۔

پاکستان می توروالی بنُو

مھی جیِب توروالی چھی۔ 1990ء سی وخ ما کے یأ آ کالج می آشُودا مھیئے چیر گن اندازہ ہی یرأ مھو او مُھون جیِب چیر گن پتکے تھلیل آں ٹین کُوئل تھی۔ مأ خلگا می تُنُو اصل پیانُو سی آں تنُو تباریخ سی بارا میں گھن مسئلہ ڈیِڑ آں مأ ڈیڑ یرأ کا یأ ہأ ئے ہیِن پیانُو او اصل سی بارا می ہیِن ٹین کُواڑے بنُودُودا ہئے تیس تُنُو خُوئی خصلت می گاڑ کیِدُو۔ مثلاً خلَگے ہأ ئے بنُو یرأ تُھون کی تباریخ نہ تُھو، کی جیِب نی چھی۔ پاکستان می گھن کھام لؤ کھاما سی جیِبا ئے جیِب نہ بندی بس بنَدی ہے ہائمُو کآں دأل جیِبا سی دھأل دھأل شکل تھیِا۔ کامے جئِب لیِگیل نی ہیو بنَدی ہیدا کی جیِب نی چھیِا۔ مھوئے کامے پیانُو/شناخت پٹھانے مھو ٹین کیدے مھوئے دیِدتا مھوئے تیس پیڑیِا ما تُنُو کی۔ أئں اے ٹین کؤ او پتکے تھلُو سی وجہ دے توروالیِے شمالی پاکستان سی دأل کھاما سی شانے اے دُو پیڑیِا ما بعد تُنُو شناخت آں تُنُو تباریخ آمُوݜا تھلُو۔ ہأ ما تُنُو دأل داردی بھئیا سیت ثقافتی او نسلی رشتہ ہُم ہأڙاد میلائی مے ٹین کؤ او ݜگؤ سی وجہ دے ہے تُنُو بھئیا ما جُدا ہُوئی شی۔

آ یأ کالج می آشُودا مأ محسوس کی یرأ کھأکأ پختو ژیِبے طاقتور کھاما سی مھی کلاسی جدگ مھوئے اُوپھُوڑ بُودی آں اے وجہ دے مھو سیت سماجی، تعلیمی او ثقافتی بغض کیدے مھوئے دھأل نظریدے بُودی۔ ایندے مھیئے ود میلاؤ ہُو یرأ آ ایِسی جواب دئی۔ مأ لؤ لؤ گروپ سوؤ شروع کی تُنُو کلاسیِا سمان مے مقصد سی کیا یرأ مھی خلگا می تعلیم آں خط کؤ چیری ہُوئے۔ سن 2000ء ما بعد مھی رابطہ باہر سی خلگا سیت ہُوئی سے شمالی پاکستان سی جیِبا زید تحقیق کؤدُود۔ مأ تُنُو جذبہ او مقصد سی کیا تھأ سیت مددگار سی کام شروع کی۔ ای ما بعد دأل توروالی زُوانا سیت میِلدے مأ توروالی زید منظم ہیدے کم سی کؤ سی کوشش کی میلائی ایندے کام تیِریِقی کُوئین مُوا مُوٹھائے بیدُو۔

چیر گروپا سی سوؤ ما بعد مھوئے آخرکار الیف بے تے [1] سی نام دے یعنی ادارہ برائے تعلیم و ترقی سواد۔ الیف بے تے اردو سی اوّل حروف (ا ب ت) تھی۔ سوؤ ما مِتکے آ ایِسی بانی او لیڈر تُھو آں مھی زمہ واریِا می ایِسی ٹول پلاننگ، ڈیرائن آں (ائی بی ٹی) ایِسی گھین پن زید چلؤ تُھو۔ آ ارود او أنگریزی اخبارا می ہُم اردو او انگریزی می جیِب، آمن، اتفاق آں تعلیمی پالیسیا زید لیِگدُو۔
ائی بی ٹی سی سوؤ چیر اہم آشُو کئیکہ ای تھأ ٹول کارکن مھأ سمان ایپود کیدے منظم کام شروع کی۔ ای ما علاوہ ای اے تجربہ کار آں چیر شوقین ٹیم پیدا کی۔ آں ورسرہ دأل ماݜ او جوَئیا ئے نوکری ہُم دیِد۔ اے رسمی تنظیم سی ہؤدے نقصان ہُم ہودی کئیکہ مُھن میل چیر خلگ این جی اوزا ئے کی غورا نہ بنَدی بلکہ ہیِن بارا می بنَدی ہے دا دأل وطنا سی ایجنٹ ہودی آں ہیِن بیِریِت کآں مقصد ہودی۔ پاکستان سی ریاست سی ڈھأرا ہُم این جی اوز کے لاݜ بُوا بیَدُو۔ این جی اوز یئد ہُم پاکستان سی فوز، ادارہ آں سیاسی پالیسی ساز خلگا سی شانگا نہ لھنگدی۔ تھیِن نیِز می ہر سے نم آں دھأل کام یأ تیندے خلگا می بیداری پیدا ہوئی، تھأئے تھیِن حقا سی پتا گھڑَئی آں تھا ئے شعور دیِا بیَدُو او ہال کام ”قومیز اتحاد“ کھاما سی تڑُون سی کیا نقصان دہ تُھو۔ ای ما پاکستان می مطلب مذہب او حب الوطنی سی نام دے آں آمن شوگ څنڈؤ سی بنیاد تے ٹول خلگا زید لھاڑ تھأدے زورأ”ایشانا“ کؤ تُھو۔

ہأل شانا خُوئی دے مدام این جی اوز او دأل سماجی تنظیم ٹارگٹ کیِدی۔ پاکستان می این جی اوز او دأل سماجی خلگ او تنظیما سی بیِساسُو، ہأئے دھمکی دیؤ آں ہأ زید نظر تھؤ سی زور تھلا لائی چیری ہودُو کے یأ پاکستان می کی سیاسی مسئلہ پیدا ہُو یا پاکستان سی تُنُو گھأنڈی وطن ہندوستان او افغانستان سیت کی گڑبڑ ہؤسأدو۔ بدقسمتیِا پاکستان می سیاسی گڑبڑ یئد ہُم ختم نہ ہوئی آں وطنے ہے سیاسی تھیپ تھاپ فوز سی سیاست می ہادے دیؤ سی وجہ دے ہوئی۔ پاکستان می خلگا سی آواز زید آں أں بن کؤ سی کیا بیلأ سی چھلے گن قانون تھی۔ ای ما سماجی کارکن آں انسانی حقا سی کیا آواز اُوݜُو والا کارکن بھا کُوابَیَدی، ہاڙیُو او مئیگ عام بات چھی۔ میڈیا ہُم بان کودی۔ ہامُوڑ ڈیجیٹل میڈیا زید ہُم پابندی ہوئی۔ آ تھوئے وائے بندُو۔

توروالی تحریک، ڈیجیٹل اؤزار آں ہراسگی

توروالی جیِب سی جینی کؤ آں مُوٹھائے نیُو سی کیا پأنیل کما می اے کام توروالی جیِب سی مواد جمع کؤ، ایِسی سمَگؤ آں توروالی جیِب او ثقافت سی تیِریِقی سی کیا ڈیجیٹل آں سوشل میڈیا سی استعمال تُھو۔ ڈیجیٹل او سوشل میڈیا توروالی خلگا می توروالی جیِب سی لیگُو آں پڑھاؤ کؤ سی کیا ہُم گن استعمال ہوئی۔ ایِسی کیا ائی بی ٹی سی ٹیمے گوگل سی مدد ئے دے 2016ء میں اینڈرائڈ موبائل فونا سی کیا اے کی بورڈ ہُم سوادتُو۔ دُئی دیِشکے ٹیم ائی بی ٹی انسانی حقا سی خلاف ورزی، سرکار سی دیِشا لاݜ کما سی خلاف، مھأ پتکے دھریل کھاما سی تیِریِقی سی کیا آں مھید ماحولیات او زنگلا سی حفاطت سی کیا آواز بھاکودُو۔
سوشل میڈیا یأمینے فیس بک، یوٹیوب آں ٹُوئٹر ئے اے مخیز آں اے سوچ سی خلگا ئے اے گھن موقع دیِدتُو یرأ سے آمن آں تُنُو کھام تھأ خلگا سیت میِلادی کامیک یأمینے زیِدی او زُومانے مُوش ایکدُوئی ما ہأڙادتی۔ سوشل میڈیا دے خلگا می توروالی جیِب سی خط چیری ہُودُو آں توورالی ڙو او موسیقی ئے تیِریِقی سمان خلگا می توروالی شناخت ہُم چیری ہُودُو۔ چیر مھال توروالی یرأ تھیِن جیِب تھئے کیا آمُوݜا گیئی آں تھأ ئے أ معلوم نہ آشُو یرأ سے کام تھی آں سے آمن گے پختون بنُودُود، مھیرے ائی بی ٹی سی کم سی وجہ دے تھائے تھیِن شناخت سی پتہ گھیڑی آں سے مھیرے تُنُو خلگا سیت پخولا ہُوئی۔

جیؤ بے شُولا نہ ہودُو۔ میوہ بے سختیِا نہ ہودُو۔ ہامُوڑ ائی بی ٹی ٹیم ہُم چیر شُولا سی، چیر مسئلہ سی آں چیر پن گے تھلیل ݜنگا سی مُوخا می آپ کے یأ ای سوشل میڈیا سی استعمال تُنُو کم سی کیا چیری کیِدا۔ مھو مسلسل تُنُو کھام سی یام یام خلگے تینگی کی، مُھن خلاف شیطأنی کی، مھو پیش پیِڑپأشا بأت کی، مھوئے دھکمی دیِد آں مُھن کردار کُشی کی۔ ایمی ریاست سی ادارہ سی یام خلگ ہُم شامل آشی۔ مھوئے تُنُو مواد سی مسئلہ ہُم ہُو۔ مُھن مواد بُورا گا۔ یام اینأتیِے دا مے کوشش ہُم کی یرأ مھو خلگ جمع کیدے ہأ کیِٹ تے مَئی۔ ہئے ٹیم ائی بی ٹی زید حملہ سی کیا چیر انتہا پسند خلگ ہُم ایِشیِژأد۔

سوشل میڈیا کافی حدا پرکے ادارہ سی ہات ما دُھو چھی خو کام یأ سوشل میڈیا استعمال کودُو، آں انسانی حقا سی کیا کودُو او ہأ خلگ سیاسی او مذہبی پارٹیا سی خلگ ایِں تینگی کودی، ہائے گأل دیدی آں ہأ زید الزامات ݜَئیادی۔ مے کم می یام سیکیوریٹی سی ادارہ سی خلگ ہُم شامل ہودی۔ پاکستان می عمومی سوچ ما دھأل ہؤ آمن گے کام بُو تُھو آں آمن چیز خلگا سی آں محکمہ او ادارہ سی دشمن کؤ تُھو۔ پاکستان میں انٹرنیٹ آں سوشل میڈیا سی استعمال می چیر رکاوٹ تھی۔ ایمی کنکشن سی آں کام یأ استعمال کودُودا تیِسی حق زید پابندی ݜیَؤ ہُم شامل تُھو۔ پاکستانی حکومت مھیرے ہُم انٹرنیٹ زید کنٹرول کوئی: ایس بان کوئی، ویب سائٹس بلاک کوئی، حکومت او ادارہ زید تنقید بان کوئی آں کام ہامُوڑ تنقید کودُو او تیس گوٹ کے تھلئی، خلگ ہاڙائی، اغوا کوئی آں کارکن خلگ بدنام کوئی۔ مھأ کارکن آں تنقید کُواڑ خلگا پیش پیس دیدے بے نام سوشل میڈیا اکاؤںٹ سیوأدے ہأ ئے گأل دیئی آں ہیِن او ہیِن شیِرا سی بے عزتی کوئی۔
طریقہ کار او ٹیِنگ ہؤ

جانگ ٹینگؤ بُوکھو ہودُو خو ہر انسان گے نتائجا سی کیا تیا ہؤ پکار تُھو آں آمن نم حالادا سیت برابر کؤ تُھو۔ این دے حالادا سی مقابلہ ہوبھائی۔ تُنُو آمن گے خطرہ سی چیری ہؤدے آں آمن خطرہ ئے تیا کؤ سی کیا ٹیم ائی بی ٹی بأت او مخشُولا سی کیا طریقہ سواد آں خلگا ئے مُخامُخ آں سوشل میڈیا دے آوؤ سی پان آمن گے سیوأد۔ مثال دے مھوئے سوشل میڈیا زید اردو او توروالی می تُنُو بأت بنُو چیری کی یرأ خلگ مُھن بأت ما غورا جنین آں ایندے مخالفا سی پروپیگینڈا ناکام ہوئے۔ ٹیمے سیاسی پوسٹس کم کی آں تعلیم یافتہ زُوانا سیت مخشُول ہؤ چیری کی آں مقامی مسئلا زید توجہ دیِد کامیک یأمینے عام آں ٹول خلگا سی مسئلہ تھی آں تھیِن کی سیاسی پارٹی سیت تعلق نہ تُھو۔ ای سیت ٹیم ئے کورونا سی وقت می تُنُو خاص کام، تحقیق او کتاب چاپ کؤ، زید چیر زور دیِد آں خلگا ئے سوشل میڈیا سی پندے آوؤ سی کوشش چیری کی۔ ٹیمے سماجی سرگرمیا می شامل ہؤ چیری کی تھأمی غم خادی، مقامی جرگہ او یَرَگ آں سماجی معاملات آشی۔ دُوئی دیِشکے ائی بی ٹی سی ٹیمے پاکستان او دُونئی سی دانشورا سیت آں سماجی کارکنا سیت رابطہ چیری کی۔ ہامُوڑ آمن وطنی آں غیر وطنی تحقیق کارا سیت آں سماجی کارکنا سیت میلاؤ کی۔ ریاست سی ادارہ می یام افسرا سیت ہُم رابطہ دوبارہ جینی کی۔

بھا ئے ہأ طریقہ ئے بُودے أ ہُم جیِب زید کام کؤ والا خلگا سی کیا ضروری تُھو یرأ سے آمن نھیؤ مقامی آبادی می مختلف گروپا سیت سوَن کئیکہ نھیؤ خلگا ما نقصان چیر ہودُو۔ ہامُوڑ تُنُو بأت کؤ سی آنداز ہُم بدل کؤ پکار تُھو کئیکہ ایندے خلگا می غورا رائے پیدا ہوبھائی خو تھیِن سیاسی او مذہبی احساساتا ئے کی نہ بنُو پکار تُھو۔ تنوع برادشت نیِمادُو آں ایِسی ختم کؤ یا مضبوط کؤ می بأدا سی کؤ سی طریقہ سی گھن کردار تُھو۔

ٹیم سی ممبرا ئے مھأ طریقہ سی کؤ یعنی سوشل میڈیا زید سیاسی او مذہبی بحث کم کؤ، خلگا سیت أمیِنی میلاؤ ہؤ آں مقامی خلگا میں چیرے متحرک ہؤ سی باوجود مُدام خطرہ موجود ہودُو یرأ ایک دُوئی سیت سیاسی تکرار آں شر شاتار نہ ہو کئی کہ پاکستان می سیاسی ٹینشن چیر گن تُھو آں خلگ ایگدی سیاست سی ݜا زید گھوروڑا گݜَدی۔ أ مھے زید خون نو کودُو کہ آ تُنُو سأدا سی آواز بن کیئی خو پاکستان می سیاسی او مذہبی بحثا می ݜیُو دے مُھن تُنُو کم گے نقصان ہودُو۔ ایِسی کیا آ غورا جیندے آں وائے مھأ دھأک مشورہ دیؤ سی کوشش کودُو:

1۔ ٹیم ائی بی ٹی سی کیا غورا آں متاثرکن تربیت پکار چھی یرأ ہے تیندے جنَن کہ کھأکأ تُنُو مواد بچ کوبھادی، تُنُو پرائوسی بچ کوبھادی آں کھأکأ ڈیجیٹل سلامتی سی کیا نم طریقہ ڇھیِڙ بھادی۔
2۔ مے خیال سی فنڈ پکار تُھو۔ ایِسی کیا ٹیم ائی بی ٹی سی کوشش پکار چھی۔
ٹیم ائی بی ٹی مھیرے تُنُو کم سی کیا یعنی توروالی جیِب سی جینی کؤ سی کیا غورا پأنیل تُھو۔ مھو تُنُو مے مقصد می جذبہ دے آن لائن آں آف لائن لیگیا تھی، مھوئے أ خیال تُھو یرآ تُنُو جیِب سی، ثقافت سی، شناخت سی آں حقا سی بچ کؤ سی کیا کم می مھوئے ڈیجیٹل آں دُوئی حفاظت ضروری چھی۔

[1] الف بے تے (ا ب ت) توروالی او اردو سی مشترک حروف تھی آں پڑھائی، علم آں خط ظاہر کودی۔ ہأ حروفے ما ادارہ برائے تعلم و ترقی (ا ب ت) سوا بیدُو۔