Gianni Llanquiray Nahuelhual Tornini ñi adwirin Rising Voices-ngealu

Simona Mayo engu María Alvarez ñi wiriel, fey tuwülu feychi “Poyewün engu mapudungun politiko interkultural dungungey engu: mapudungun ñi konküleel Convención Constitucional mew” pingechi chillka mew, fey Simona Mayo ñi wiriel.

Wirintukumekengelu tüfachi we Constitución Chilemapu mew 2022 tripantu, pu mapuke che ta “fewla kakünuay taiñ adeluwün pu Estaw engu, feychi Estaw kuyfi taiñ püntülnieetew nga, kuyfi taiñ küpa apümafetew llemay” pilefuy tati. Fey Elisa Loncon Antileo, mapuche domo, kimeltuchefe, inarumekewünfe, longkokünungelu Convención Constitucional mew, fey ta kafey adkünuy dungu ñi witrañpüramngeael mapudungun tüfachike fütrake wingka trawün, fey ñi doy newentuael iñ poyewün mew. Elisa ñi ngüneduam nganürkey reke fillke kimün ka pewma ñi püdümngeael ka kintuniengeael taiñ fill kewün taiñ nieel, fey fachantü nga taiñ yafüluwam piwke, fey taiñ rakiduamyeael kümeke ngünen kake mapu mew, redes sociales mapu reke.      

Kiñe troytrawün Convención Constitucional mew Elisa Loncon feypi ñi chemngen tüfachi poyewün dungu mapudungun mew: fey tati üy taiñ piwkeyewael, fey ka taiñ adümuwael kafey taiñ allkütuwael tati. Nütramkayelu “poyewün” dungu Elisa, fey llemay mapudungulen konpuy newentumekeael wingkake trawün mew, kafey puwi internet mapu mew chew ñi doy mülepemum wingkadungun. Welu kafey mapudungulen newenturkey witrañpüramngeael poyewün dungu ka chemchi dungu, fey kisu ñi ingkañpewam ka katrükaafiel feychi pu üdenietew ka pu illamtunieetew ka triparkelu allkütunielu Elisa ñi dungu ka ñi wewpin.    

Llamo a las y los convencionales a hablar desde el poyewvn, el amor. Somos seres humanos, tenemos iguales derechos y con ese amor vamos a aceptar que seamos diferentes. Porque hay identidades diferentes en todas las casas. pic.twitter.com/jco0Z1eY8N

— Elisa Loncon Antileo (@ElisaLoncon) July 21, 2021

Fürenemuchi, kom pu che mülelu tüfachi fütra trawün mew. Iñchiñ poyewün mew dunguwaiñ. Iñchiñ chengeiñ, ad-duam nieyiñ ta iñchiñ, fey tüfachi poyewün mew “ka feley taiñ wichulen” pileaiñ tati. Fill chengen mülerkelu am fill ruka mew.

Ütrüfentungellefel wüla rume tüfachi we Constitución 4 konchi septiempüre 2022 plebiscito mew, Elisa engu kisu ñi trokiñche ñi müleel tati Chilemapu Convención Constituyente mew rume duamfalirkey tati, femngechi dungu ñi rupanokefel Chilemapu mew. Turpu pu Chilemapu Estaw engün llitunke che ka kisu ñi kewün femnechi adeluwkelaingün. Kafey wefürkey ñi müleken illamtun dungu Chilemapu mew, wenuntukelu re wingkadungun – ka occidental dungu – kake kewün mew, kake admongen mew, kake adkünun dungu mew. Küme peniengeam Elisa ñi falinchengen ka ñi newenchengen, kiñe mapuche domo yenierkelu tüfachi wirintukumekefiel kiñe we constitución, witrañpüramnielu kisu ñi kewün fütrake wingka trawün ka internet mew,  feymew müley taiñ lelintukuafiel Elisa chew ñi tuwün ta Chilemapu mew, kafey pu mapuke che ñi weychameken newentuam kisu ñi kewün ad-duam mew.

Chilemapu ta “kiñe kewün-ngelu iñchiñ” trokiwkelu 

Epe kom Latinoamerica mew mülechi mapu reke anükonpangerkelu pu ka tripache mew, Chilemapu ñi puke che ta “kiñe mapungelu iñchiñ, kiñe kewün-ngelu iñchiñ tati, ka ñidolkünuwürpulu iñchiñ tati llitunke che mew mülefulu faw” trokiwkelu tati. 19ke tripantu mew tüfachi trokiwün elkünungerkey kiñe fütra chillkatuwe dungu mew fey re kim wingkadungulam pu llitunke che, fey “civilizakünungeael” engün, kafey femngechileael fill püle tüfachi fütra wingkawün ka apümkawün llitunchengen. Mülellefel rume tüfachi müntuñmangeafel mapu, chengen, admongen, kewün ñi pu llitunke che, petu mülekarkey Chilemapu kayu kake kewün españoldungun-ngenolu: aymaradungun, kechwadungun, rapanuidungun, kaweskardungun, yagandungun, mapudungun, kafey ckunzadungun, fey amulniemekengelu fantepu.

Chile ñi pu Estaw ñi “kiñe kewün-ngelu iñchiñ” trokiwmeken mew, llitunke che Chilemapu mew ñi nengümkan ka ñi fill trokiñche engün mekeingün kisu ñi küdaw engün wenuntunieafiel, amulnieafiel, ka püdümnieafiel kisu ñi puke kewün engün, müngel rupayechi epu-mari tripantu mew. 2010 mew tüfachi Trawün ñi Müleael Nordungu Chillkatun ka Kewün mew pu Chilemapu Llitunche lliturkey küdawmekeael elngeam tati Nordungu ñi Müleam Ad-duam Kewün mew pu Llitunke che, fey nünietungeael kiñe fütra nordungun Constitucion mew konkülelu “mülelley may fill kewün ka kisu ñi puke dungufe” piael. Fey ñi amullenofel engün adkünun ka nordungun mew ñi llowngeael ñi müleyen fill kewün, puke trokiñche amulniey engün ñi küdaw fill welliñ mew, fey ñi ñamnoael ka amulkünuael fill kewün, inanke che elelkünungeam engün. 

Taiñ kakewmen ka tati constitución wirintukun

Tüfachi 18 konchi Oktufüre fütra awkan, kafey tüfachi we constitución wirintukumeken, fey engu wiño konümpatuy engu feychi dungu ñi che-trokingeael pu llitunke che ka “ad-duam niey engün” piael ka. Kafey tati adke duam admongen mew ka kewün mew fütra wüla ñi wünenkületuel engün fütrake nütram constitución ñi wirimekeel mew, kiñe dungu turpu rupanofel Chilemapu mew. Rupachi tripantu pu che ñi fütrake nengümkan wepümi pu che ñi illkuyen Chilemapu ñi pu trokikelu mew, kafey wepümi pu che ñi fütra küdawtumeken ñi kümefeleael, fey ta tripalu neoliberal adkünun elkünungelu 1973-1989 soltaw dictadura mew.        

Mülerkey epu ñidol rüpü elngelu tüfachi fütra awkan mew: kiñe rüpü ta pu che ñi fütra awkayael waria rüpü mew ka fill trawün mew, wekuntulelu fütrake trokikelu ñi dungu mew; kangelu rüpü ta nütramkayael pu Estaw, politiko trokiñche, ka pu trafche ñi fill trawün engün, fey kom traftuingün elael feychi Chilemapu Convención Constitucional. Epungechi rüpü tüfachi Convención niey kiñe ñidol duam, fey ta wirintukuael kiñe we Constitucion-ngeachi chillka, fey amulelu kuliw 2021-kuliw 2022. Nütramkawün ka fill rakiduam mew wirintukungeafulu kiñe chillka welulnentungeael tüfachi Constitución elngelu Augusto Pinochet ñi dictadura mew.    

Femngechi tati Convención lliturkey Elisa Loncon ñi dullingen mew longkoleael: mapu domongelu, kimeltuchefengelu, ka weychakelu witrañpüramngeael puke mapuke kewün. Fey konkülerkey kiñe kuyfi wentru mew ngüneniengekeelchi welliñ ka kiñe Estado mew adkünuelchi dungu, chew llitunke che “che” trokingenomum tati. Longkokünuel Elisa, tati pepilfalchi dungu mew wefi ka kisu ñi newen mew, Elisa kiñe wewpin mapudungun mew llituli tüfachi trawün, fey wirintukuafiel Chilemapu ñi Constitución. Fey wüla, Elisa ka ñi trokiñche engün tukulfi kiñeke üy mapudungun mew, fey kakünufilu kafey chumngechi ñi adeluwün che Convención mew: fey tañi lamngenyewael pu mapuche ka pu mapuchengenolu. Femngechi llemay Marta Yáñez Queupumil, Elisa kiñe ñi trokiñ che, feypi:     

Mapudungun ñi püneel kaleturkey tati, fey kechu konchi kuliw periódicos ñi ad lliturkey mapudungun mew feypinielu “mari mari, kom pu che”. Ayelen tripay Elisa, renengnielu kiñe mapuche pantira, dew longkokünungelu, femngechi amurkey. Llitunke kewün ñi pünekeel, Elisa ñi nentuel ñi wünen wewpin longko reke mapudungun mew, fey nülakünuy kiñe wülngiñ reke taiñ kakünuael kuyfike dungu ka admongenke dungu.

Kiñe ramtukan nütram mew Rayen Cariman, trokiñchengelu, feypi: “müna küme tutelu taiñ pefiel taiñ kewün ñi konkülefel chew ñi felen ñi konkülekeafel kiñe kewün reke, kiñe küdawpeyüm nütramkawael, fey kiñe chemkün mülelu museo ruka mew no.” Femngechi mapudungun ñi kimelngen poyewün mew eluwi ñi nentungeal taiñ kakewmen ka taiñ fill mollfüñ-ngen, adkintunienolu politiko wewpin mew. 

Awükan dungun internet mew        

Femngechi may, pengelmekengelu fill admongen mülelu Chilemapu, Elisa ñi longkokünungen mew, kafey pewfaluwürkey chunten illamtungekeel ka üpülniengekeel pu llitunke che, welu kom tüfa miñchelelu reke kom pu che mew, medios de comunicación pingechi dungu mew, ka redes sociales dungu mew. Femngechilerkey Convención mew konkülechi Teresa Marinovic ñi dunguyefiel machi Francisca Linconao. Kisu ñi kewün mew, mapudungun mew wewpilelu machi Francisca tüfachi fütra trawün mew, Teresa wirintukuy Twitter mew: “kisu ta re duamnierkey ñi nentuael kisu ñi show müten.” Femngechi katrüntukun dungu, fey ta llitunke kewün ta llowngeingün re ñi kangechingen mew müten, welu küpa kakünuyüm kuyfike adkünun dungu, fey küme llowngekelaingün. Fey püraleyüm llitunke kewün ka wewpiyüm fütrake kollagtun mew ingkañpengeael kishu ñi ad-duam, ñi weychameken mew, fey newe tutekelafingün feychi kuyfi tañi longkongeken.  

Pünengeael mapudungun kiñe weychapeyüm reke ka poyewün mew, fey ella kuñiwün-ngey, fill fütrake institucional trawün mew, kafey cibermapu mew ka yenielu tüfachi kiñe-kewün rakiduam, fey kafey ciber awükan-ngetukelu. Wünelu mew kuñiwün-ngey feychike ad-duam kewün mew ka admongen mew: fey mapudungun ñi pünenienel ka ñi müleel ta fütrake welliñ mew tutelafi kiñeke trokiñ che internet mapu mew, feymew ngünaytungelay feychike mapudungufe ñi ñidol ad-duam tañi dunguñmuael  ka müleael ñi kewün mew, fey trürküleam ñi mongen.     

Fey wüla ka kuñiwün-ngey ñi awükangeafel internet mapu mew. Feychi red social Twitter pingelu doy pünengerkelu tati ñi llükalkayafiel ka lloftuafiel feychi mapudungufe konkülelu Convencion mew Elisa Loncon reke, chew pengelngey Elisa chew ñi mülen kisu ñi ruka. Fey ñi trokiñche doy kuñiwün-ngechi llükalkachen dungun, fey ta küparkelu Elisa ñi Twitter chillka mew. Feychi dungu mew, Elisa feypirkey kiñe ramtukan nütram mew: “Pepi kiñewküleafuyiñ taiñ kakewmen mew, welu taiñ llamuwael may, taiñ kiñekawnoael. Feychi Chile nielu kiñekawün rakiduam allfüluwkelu tati, fey tañi “ngelay kake che faw, iñchiñ müten” piken mew.  

Elisa Loncon ñi trafkonün dungu mew, fey ta newenkechi “puke kewün ta re chemkün ashküleam müten no” feypirkey reke, fey puke kewün ta fütra kimün ta wülkefilu ñi pu dunguletew engün püllü dungu, admongen dungu, weychan dungu ka alün fütra kimün. Ñi trafkonün dungu mew Elisa pengeli ñi katrükangekenon mew feychike wedafem-ngen ka ñi ngenon mew che trokingen pu dungufe Elisa reke internet mapu, fey püneniekelu feychi welliñ ñi neweñmayafiel ka anümtukuafiel reke kisu ñi kewün engün, feychike kewün kuyfi illamtungekelu tati. Feychi kimtukun mew triparkey kiñeke ngülam, fey taiñ rüpü ürke Internet ñi mületuael kiñe welliñ iñchiñ iñ adeluwael poyewün mew, fey wenuñpürampeyüm ñi doy müleam fill kewün, fey püneniengeal tüfachike internet küdawpeyüm ingkañpeam ka witrañpüramam feychike kewün tati:       

• Rakiduamkünungeael ka adkünungeal kiñe küdaw doy ngüneduam mületuael feychike pünenieelchi kewün fill mülewe mew, oficialngelu, internetngelu kafey. Tukulkünungeael fill kümeke ngünen püdümngeael pu llitunche kewün dungufe ñi ad-duam puwael feychike che “tüfa weda dungu” pilekelu, üdeniekefilu ka lukatukefilu internet mew.      
• Rakiduamkünungeael küdawpeyüm ka küme ngünen internet mew, fey pu weychakelu ñi pünenieam ingkañpeafiel llitunke kewün tati. 

Elisa Loncon engu ñi trokiñche, fey engün ñi konkülen ta Chilemapu Convención Constituyente mew, fey rume fütra dungu ürke, turpu ñi rupakenofel kuyfi, femngechi pu Estaw engu llitunke che ñi trawüael. Ñi pewfaluwüllefel rume üden ka illamtun dungu ñi küpa takuniefel pu llitunke che mülelu tüfachi mapu mew, kafey konpuy may che tüfachi welliñ kewün-newen mew, feychike nütram ka tukulpan mapudungun ñi yeniekeel tati. Tüfachike welliñ tukulpaleiñmew Wallmapu ñi newen ka ñi küpa kollagtuael, fill müleyechi kewün mew, fill müleyechi fütrake mapu mew ka mülekefulu tüfachi Chilemapu pingerkelu fantepu.  

Feychike kimtukun mew chumngechi am rakiduamafuyiñ femngechi internet welliñ chew ngünaytungeam taiñ kakewmen? Chumngechi am doy püdümngeafuy taiñ kewün, kafey taiñ ngünaytungeam ñi pu dunguletew? Tati Convención ñi küme rakiduam, fey ta poyewün mew ta newentumekeael taiñ küme adeluwael fill welliñ institucionalngelu, ka internetngelu, fey taiñ llituafel amulkünuael taiñ fill kewün dungulken internet mew.